മിസോറം ഭൂപടം

മിസോറം സംസ്ഥാനം ഇന്ത്യയുടെ വടക്കുകിഴക്കൻ സംസ്ഥാന സമുച്ചയത്തിൽ ഒന്നാണ്. മ്യാൻമർ, ബംഗ്ലാദേശ് എന്നീ അയൽ രാജ്യങ്ങളാലും മണിപ്പൂർ, ആസാം, ത്രിപുര എന്നീ ഇന്ത്യൻ സംസ്ഥാനങ്ങളാലും ചുറ്റപ്പെട്ടു കിടക്കുന്നു മിസോറം. ഈ സംസ്ഥാനത്തിന്റെ ഭൂപ്രകൃതിയുടെ മുഖ്യഭാഗവും മിസോ കുന്നുകളാൽ നിറഞ്ഞിരിക്കുന്നു. സമുദ്രനിരപ്പിൽനിന്ന് 4000 അടി ഉയരെയുള്ള ഐസാവൾ നഗരമാണ് തലസ്ഥാനം.

സംസ്ഥാനത്തെ ജനങ്ങളിൽ നാലിൽ മൂന്നും കൃഷികൊണ്ട് ഉപജീവനം നയിക്കുന്നവരാണ്.   നെല്ല്, ചോളം, കടുക്, കരിമ്പ്, എള്ള്, ഇഞ്ചി, ഉരുളക്കിഴങ്ങ് എന്നിവയാണ് പ്രധാന വിളകൾ. കൃഷിയുടെ പുരോഗതിക്കായി ചെറുകിട ജലസേചന പദ്ധതികൾ നടപ്പാക്കിയിരുന്നു. സംസ്ഥാനത്ത് പ്രധാനപ്പെട്ട വ്യവസായങ്ങൾ ഒന്നും തന്നെ ഇല്ല.കൈത്തറി-കരകൗശല നിർമാണം, പട്ടുനൂൽ, ഈർച്ച മില്ലുകൾ, ഫർണിച്ചർ നിർമാണം, എണ്ണ മില്ലുകൾ, ധാന്യ മില്ലുകൾ എന്നിവയാണ് ചെറുകിട വ്യവസായങ്ങൾ. ടൂറിസവും ആരോഗ്യ പരിപാലനവും വളരുന്ന വ്യവസായങ്ങളാണ്.