ഹരിയാന സംസ്ഥാനത്തെപ്പറ്റി അല്പം
ഹരിയാന സംസ്ഥാനം 1966 നവംബർ ഒന്നിനാണ് നിലവിൽ വന്നത്. ഇന്ത്യയുടെ ഹരിതഭൂമിയെന്ന് അറിയപ്പെടുന്ന വളരെ ഭലഭൂയിഷ്ഠമായ മണ്ണും പ്രകൃതിയുമുള്ള സംസ്ഥാനമാണ് ഹരിയാന. ഡൽഹി കേന്ദ്രഭരണ പ്രദേശം മൂന്നുവശത്തുനിന്നും ഹരിയാന സംസ്ഥാനത്താൽ ചുറ്റപ്പെട്ടിരിക്കുന്നു. ഹരിയാനയുടെ തലസ്ഥാനം പഞ്ചാബിന്റെകൂടി തലസ്ഥാനമായ ചണ്ഡീഗഡ് ആണ്. സംസ്ഥാനത്തെ ഏറ്റവും വലിയ നഗരം ഫരീദാബാദ് ആണ്. ഇന്ത്യയിലെതന്നെ ഒരു പ്രധാന വ്യാവസായിക മേഖലയായ ഗുഡ്‌ഗാവ് ഹരിയാനയിൽ ഡെൽഹിയോട് ചേർന്ന് കിടക്കുന്നു. ദേശിയ തലസ്ഥാന മേഖലയിൽ ഉൾപ്പെടുത്തി ഹരിയാനയുടെ ആറോളം ജില്ലകൾ വികസിപ്പിച്ചുവരുന്നു.
ഹരിയാനയുടെ ഭൂപ്രകൃതി ഉപ-ഹിമാലയൻ താഴ്‌വര, ഇൻഡോ-ഗംഗ സമതലങ്ങൾ എന്നിങ്ങനെ തരം തിരിക്കാം. സമതലങ്ങൾ ഫലഭൂയിഷ്ഠവും ജലസമൃദ്ധവുമാണ്. തെക്കുപടിഞ്ഞാറൻ ഭൂപ്രദേശങ്ങൾ മണൽ നിറഞ്ഞ അർദ്ധ ഊഷര ഭൂമിയാണ്. യമുന, ഘഘർ എന്നീ പ്രധാന നദികൾ ഹരിയാനയിൽ കൂടി ഒഴുകുന്നു.
ഹരിയാന ചരിത്രം
ഇന്ന് ഹരിയാന എന്നറിയപ്പെടുന്ന പ്രദേശം വേദകാലത്തിന്റെ പൂർവ്വഘട്ടങ്ങളിൽ (800-500 BCE ) 'മാധ്യമ ദേശ്' എന്ന് വിളിക്കപ്പെട്ടിരുന്നു. ഈ പ്രദേശം ഹിന്ദുമതത്തിന്റെ ജന്മദേശമായി കരുതപ്പെടുന്നു. ആര്യ സംസ്‌കൃതിയുടെ ഗൃഹമായി കണക്കാക്കപ്പെടുന്ന ഇവിടെ പൗര്ണമിക ഹിന്ദു കൃതികൾ രചിക്കപ്പെട്ടുവെന്നു കരുതപ്പെടുന്നു. ഘഘർ തട പ്രദേശത്തെ നാഗരിക സെറ്റില്മെന്റുകൾ 3000 ബിസി മുതൽ നിലവിൽ വന്നു. ബിസി 1500 മുതൽ പല ഗോത്രങ്ങൾ ഈ പ്രദേശം ആക്രമിക്കുകയുണ്ടായി. ആര്യവംശത്തിന്റെ ഭാരത വംശമാണ് ഇന്ത്യക്കു ഭാരതം എന്ന പേര് ലഭിക്കുവാനുള്ള മൂലം. കുരുക്ഷേത്ര എന്ന സ്ഥലത്തിന്റെ സാന്നിധ്യം മഹാഭാരതത്തിൽ പ്രതിപാദിക്കുന്ന കുരുക്ഷേത്ര യുദ്ധം ഇവിടെയാണ് നടന്നിട്ടുണ്ടാവുകയെന്ന വിശ്വാസം പ്രബലപ്പെടുത്തുന്നു. ബി.സി.മൂന്നാം നൂറ്റാണ്ടിൽ മൗര്യ രാജവംശം ഈ പ്രദേശം മൗര്യ സാമ്രാജ്യത്തോട് കൂട്ടിച്ചേർക്കുകയുണ്ടായി. ഇതേ പ്രദേശം പിന്നീട് മുഗൾ രാജാക്കന്മാരുടെ ഒരു പ്രധാന അധികാര കേന്ദ്രമായി മാറി. പിന്നീട് 1526 ൽ ഒന്നാം പാനിപ്പത്ത് യുദ്ധമെന്ന് അറിയപ്പെടുന്ന യുദ്ധത്തിൽ മുഗള രാജാവായ ബാബർ ഇന്ത്യയിൽ അധികാരം സ്ഥാപിച്ചു.
